Gisiguro sa Department of Social Welfare and Development (DSWD) ang padayong paghatod sa relief assistance ngadto sa mga pamilyang naapektuhan sa Tropical Cyclones Luis ug Maymay, lakip na sa padayong pag-ulan nga dala sa Habagat.
Gipasalamat usab sa ahensya ang mga volunteers, local government units (LGUs), government agencies ug non-government organizations nga mitabang sa pagdala, pag-atiman ug pag-apod-apod sa mga relief goods sa mga apektadong komunidad.
Matud ni DSWD Assistant Secretary Irene Dumlao, dako kaayo ang natabang sa mga partner sa gobyerno ug mga boluntaryo, ilabina sa mga lugar diin lisod ang pag-access tungod sa dili maayong panahon. Sa San Fernando, La Union, gipanghatod ang 2,000 ka Family Food Packs ngadto sa DSWD regional warehouse, samtang sa Laoag, Mitabang ang 15 ka tricycle drivers sa pagdala sa 1,600 ka kahon sa Ready-to-Eat Food.
Base sa pinakabag-ong DROMIC report alas-6 sa buntag niadtong Lunes, Naapod apod na sa DSWD ang 54,370 ka Family Food Packs, 2,722 ka kahon sa Ready-to-Eat Food ug 1,376 ka non-food items ngadto sa mga apektadong komunidad.
Samtang, 16,135 ka pamilya o 58,655 ka tawo ang nagpabilin sa 624 ka evacuation centers sa tibuok nasud. GIPADAYON sa DSWD ang koordinasyon sa mga LGU ug ubang ahensya aron masiguro nga maabot dayon ang ayuda sa mga pamilyang nagkinahanglan, ilabina sa mga lugar nga padayon nga gihulga sa kusog nga ulan.
Photo Courtesy: PNA
