Misaka ngadto sa ₱170 matag kilo ang presyo sa pipila ka isda sa Tagum City Public Market karong semanaha tungod sa epekto sa Bagyong Inday niadtong milabay’ng semana.
Sa pakighinabi sa Juander Radyo Tagum News Team kang Market Supervisor Jonas Tanudra sa Tagum City Economic Enterprises (TCEEO), lakip sa mga nagmahal ang matambaka nga nisaka sa ₱350 ang kilo gikan sa ₱180 ang kilo.
Dugang pa niini, misaka sab ang presyo sa barilison ug ang karabalyas nga anaa sa ₱200 hangtod ₱220 gikan sa ₱160 kilo, samtang ang moro-moro nikamada na sa ₱270 ang kilo gikan ₱180 ang kilo, ang pirit ug bodboron mi-presyo na sab sa ₱170 hangtod ₱200 ang kilo gikan sa ₱140 ang kilo.
Dugang ni Tanudra nga, nihit sumala pa ang supply sa isda ning kasamtangan tungod sa dagko nga balud sa kadagatan epekto sa Hanging Habagat nga gipakusog sa Bagyong Inday nga mihapak niadtong milabay’ng semana.
