Gibawi sa Department of Agriculture (DA) ang temporaryong pagdili sa pag-import sa mga hayop nga mahimong mataptan sa foot-and-mouth disease (FMD), lakip na ang karne ug uban pang animal products gikan sa Hungary.
Ang desisyon gisunod human ibalik sa World Organisation for Animal Health (WOAH) ang FMD-free status sa containment zone sa Hungary, nga nagpamatuod nga ang maong lugar nakasunod sa internasyonal nga animal health standards.
Sumala sa DA, ang import ban gipatuman kaniadto isip preventive measure human sa FMD outbreak sa Hungary. Apan ubos sa Department Circular No. 34, gitugotan na usab ang pagpasulod sa Hungarian livestock, karne, ug animal by-products, ubos gihapon sa higpit nga sanitary ug veterinary inspection sa gobyerno.
Matod ni Agriculture Secretary Francisco Tiu Laurel Jr., ang maong lakang nagtumong sa pagpanalipod sa lokal nga livestock industry samtang gipadayon usab ang lig-on nga suplay sa pagkaon aron makatabang sa pagmintinar sa presyo sa merkado.
Sa negosyo, gilauman nga ang pagbalik sa importasyon gikan sa Hungary makatabang sa pagpalapad sa suplay sa karne sa Pilipinas, makapakunhod sa risgo sa kakulang sa produkto, ug makapalig-on sa food security batok sa mga sakit sa hayop, kalamidad, ug kalit nga pagtaas sa presyo sa global nga merkado.
Photo Courtesy: Beef central
