Misaka ang ihap sa mga kaso sa Human Immunodeficiency Virus (HIV) sa North Cotabato, diin niabot na sa 658 ang natala nga positibong kaso hangtod Nobyembre 2025, mas taas og kapin siyam porsyento kumpara sa 596 ka kaso niadtong 2024.
Sumala sa Integrated Provincial Health Office (IPHO), kadaghanan sa mga natakdan mga lalaking nag-edad 25 hangtod 34-anyos, gisundan sa grupo nga 15 hangtod 24-anyos.
Pinakataas ang natala nga kaso sa Kidapawan City nga adunay 159 ka HIV-positive individuals. Apan gipasabot sa IPHO nga dili kini pasabot nga nagkagrabe ang sitwasyon, kundili timailhan nga mas daghan na ang nagpa-test tungod sa gipakusog nga kampanya sa HIV awareness ug counseling sa lungsod.
Gikanayon usab nga adunay one year old nga bata ang natakdan pinaagi sa inahan. Tungod niini, nagpabiling dakong kabalaka ug hagit sa mga health officials ang pagtaas sa kaso nga nalambigit sa walay proteksiyon nga pakighilawas. Busa, gidasig sa IPHO ang publiko nga mogamit sa mga libre nga serbisyo sa HIV testing ug treatment aron malikayan ang dugang nga pagkatap sa maong virus.
Photo Courtesy: Medineplus
