Nahimong sentro sa atensyon ang usa ka misteryosong vigilante nga gitawag sa social media og “Batman of Lagos de Moreno” human sa sunod-sunod nga mga insidente sa lungsod sa Lagos de Moreno, Jalisco, Mexico, diin mga tawo nga gituohang nangawat og motorsiklo ang nakit-an nga gigapos sa mga poste sa publiko.
Sumala sa mga viral nga report, ang mga tawo nga nadakpan adunay mga sinulat nga pahimangno, adunay mga marka sa ilang nawong, ug ang mga gituohang gikawat nga motorsiklo gibyaan duol kanila isip gituohang ebidensya.
Bisan pa niini, wala pa makumpirma sa mga awtoridad kung usa ba ka tawo, usa ka organisadong grupo, o mga residente nga nasuko sa kriminalidad ang responsable sa maong mga panghitabo. Nagpadayon sa ilang imbestigasyon ang mga otoridad aron matino ang tinuod nga nahitabo.
Samtang adunay pipila ka residente nga nagdayeg sa misteryosong vigilante tungod sa iyang gituohang pakigbatok batok sa kriminalidad, gipahimangno sa mga awtoridad nga ang pagpatuman sa balaod kinahanglan gihapon nga ipahigayon pinaagi sa hustisya ug angay nga legal nga proseso.
Photo Courtesy:Perthnow
