Kapin sa 50 ka teams gikan sa Amerika, Canada, Australia, United Arab Emirates, ug lain-laing dapit sa Pilipinas ang motambong sa lima ka adlaw nga internasyonal nga grassroots basketball tournament nga adunay lima ka age groups: 13, 15, 17, 19, ug 23-under.
Seryosong bugno sa hardwood ang gilauman sa mga Sugbuanong fans sa Sinag Liga Asya Junior World Showcase Season 3.0 nga ipahigayon karong Hulyo 1–5 sa nagkadaiyang venue sa dakbayan sa Sugbo.
Gikatag ang mga duwa sa Cebu Coliseum, Cebu City Sports Institute, University of San Carlos–Downtown Campus Gymnasium, ug Magnum Sports Complex. Libre ang admission alang sa tanang motan-aw.
Sumala sa Chairman sa SLA Rocky Chan, lig-on nga kompetisyon ug pisikal ang gilauman nga mga duwa tali sa lokal ug internasyonal nga mga koponan. Bisan pa sa kusog nga bisitang teams, nagtuo siya nga andam ug madasigon ang mga lokal nga koponan sa pagpanalipod sa ilang balwarti.
Photo Courtesy: CDN DIGITAL
