Mabulukong gisaulog sa pangagamhanang probinsyal sa Bukidnon ang Philippine Environment Month ug ang Child Development Workers (CDW) Congress niadtong Hunyo 26, 2026.
Gitambungan sa nagkadaiyang opisina ang gipahigayon nga tree-planting ug clean-up drive sa Provincial Tree Park aron isulong ang pagpanalipod sa kinaiyahan ug i-promote ang mga endemic nga prutas sama sa marang ug cerellas, ingonman mga mananap sama sa agila ug ebid (sailfin lizard). Gipasiugda sa aktibidad ang prinsipyo sa “tree-growing” imbes nga pagpananom lamang, dungan sa striktong lagda nga bawal mogawas sa mga trail aron maprotektahan ang mga gipangtanom.
Dungan niini, gipahigayon usab ang CDW Congress ubos sa temang “Child Development Workers sa Bagong Pilipinas: Mapagkalinga, Makabayan at Makabata.” Diha sa maong tigom, nagpaabot sa iyang dakong pasalamat ug pagdayeg si Gobernador Neil Roque ngadto sa tanang mga magtutudlo sa kabataan. Gipunting sa gobernador nga dako ug puno sa hagit ang trabaho sa mga CDW karong panahona, ilabina sa pag-umol sa husto ug lig-on nga karakter sa mga bata samtang sila nagatubo.
Giila sa pangagamhanang probinsyal ang dako nga papel ug katungdanan sa mga CDW isip kaabag sa pag-umol sa maayong kaugmaon sa mga kabataan sa probinsya.
Matod sa pamunuan, ang maong mga bata mao ang mamahimong sunod nga mga lideres sa umaabot nga henerasyon, hinungdan nga angay lamang silang tagaan sa saktong pagtagad, pag-atiman, ug giya sa ilang sayong pangedaron
Photo Courtesy: LGU – Bukidnon
