Gipahibalo sa Armed Forces of the Philippines (AFP) nga andam ang mga sundalong nakabase sa BRP Sierra Madre alang sa pagsugod sa typhoon season sa nasud.
Matud ni Rear Admiral Roy Vincent Trinidad (Ret.), pirmi nga ginamonitor sa AFP ang kahimtang sa mga sundalo ug naval forces nga naka-deploy sa West Philippine Sea (WPS) pinaagi sa lig-on nga communication lines aron masiguro ang ilang kaluwasan.
Gibutyag usab niya nga andam ang militar sa pagpadala og dugang nga mga assets ug suplay ngadto sa BRP Sierra Madre ug uban pang naval stations kung gikinahanglan.
Bisan pa sa pagsugod sa panahon sa bagyo, gibutyag ni Trinidad nga dili kasagarang maagian sa mga bagyo ang dapit sa WPS diin nahimutang ang BRP Sierra Madre, busa limitado lamang ang epekto niini sa mga sundalo nga naka-duty didto.
Gipasalig usab sa AFP nga magpadayon ang rotation ug resupply missions aron maseguro nga adunay igo nga pagkaon, kagamitan ug uban pang panginahanglan ang mga personahe nga nagbantay sa mga kritikal nga lugar sa West Philippine Sea.
Photo Courtesy: Philippine News Agency
