Nagtanyag karon og ₱100,000 nga ganti ang pamilya sa nawalang hiker nga si Alkharj Zamayla alang sa kinsa man nga makahatag og tinuod ug masaligan nga impormasyon aron kini matultolan ug luwas nga marekober.
Kini taliwala sa nagpadayon nga dinalian nga panawagan sa Pangantucan Municipal Police Station (MPS) ug sa pamilya sa biktima, bisan pa man nga opisyal nang gitapos ang active search and rescue operations sa mga awtoridad niadtong Hunyo 23 human sa 11 ka adlaw nga pagpangita sukad sa iyang pagkawala sa Mt. Kalatungan Range niadtong Hunyo 12, 2026.
Sa esklusibong pakighinabi sa Juander Radyo Malaybalay ngadto kang PCPT Ernie Cabrera, ang Officer-in-Charge sa Pangantucan MPS, iyang gipasalig nga padayon ug walay hunong ang paningkamot sa kapulisan aron masulbad ang maong kaso sa labing daling panahon. Gihangyo usab sa opisyal ang padayong pakigtambayayong sa komunidad alang sa kalinaw ug kahapsay sa lungsod samtang nagpadayon ang imbestigasyon.
Nanawagan usab ang kapulisan sa mga mountaineer, porter, ug mga lokal nga residente sa tiilan sa bukid nga i-report dayon kung aduna silay namatikdan nga katingad-an sama sa gibiyaang gamit o agi sa tiil. Alang sa mga adunay mapuslanong impormasyon, mamahimong mokontak sa Pangantucan MPS pinaagi sa ilang mga hotline numbers nga 0998-598-6873 (Smart) o 0965-826-5670 (Globe).
Photo Courtesy: Pangantucan Municipal Police Station
