Giaprubahan na sa Bicameral Conference Committee ang gisabutang bersyon sa sugyot nga magpalapad sa Private Basic Education Voucher Program, nga nagtinguha nga mas daghang estudyante ang makasulod sa pribadong eskwelahan pinaagi sa tabang sa gobyerno.
Gipahiusa sa bicameral committee ang mga probisyon sa House Bill No. 4744 ug Senate Bill No. 1981 aron mahimong usa ka panukala, bisan pa nga nahuman na ang First Regular Session sa 20th Congress.
Matod ni House Speaker Faustino “Bojie” Dy III, tumong sa maong sugyot nga hatagan og oportunidad ang mas daghang kabatan-onan nga makaiskwela sa pribadong mga eskwelahan bisan unsa pa ang ilang kahimtang sa kinabuhi.
Gipasiugda usab niya nga importante ang papel sa mga pribadong eskwelahan isip kaabag sa gobyerno sa paghatag og dekalidad nga edukasyon sa mga estudyante.
Kon mahimong balaod, mas daghan na ang kapilian sa mga ginikanan sa pagpili og eskwelahan alang sa ilang mga anak ug mas daghan usab ang makabenepisyo sa education voucher program.
Ang House panel sa bicameral conference committee gipangulohan ni Pasig City Representative Roman Romulo, samtang ang Senate panel gilangkuban nila Senador Bam Aquino ug Senador Camille Villar, uban sa mga opisyal sa Department of Education.
Sunod nga isumite ang bicameral conference committee report sa Kamara ug Senado alang sa ratipikasyon. Human niini, ipadala kini kang President Ferdinand R. Marcos Jr. aron pirmahan ug mahimong opisyal nga balaod.
Photo courtesy: Philippine News Agency
