Gipagawas na sa opisyal nga Facebook page sa IRONMAN 70.3 Lapu-Lapu ang opisyal nga race course alang sa lumba nga pagahimoon karong umalabot Agosto 9.
Magsugod ug matapos ang lumba sa Mactan Newtown sa Lapu-Lapu City diin moagi ang 1.9-kilometro nga salom, 90-kilometro nga bike, ug 21-kilometro nga dagan sa mga dalan sa dakbayan sa Lapu-Lapu, Cordova, CCLEX, ug South Road Properties (SRP) sa syudad sa Sugbo.
Sumala sa mga organizers, posible pang mausab ang rota. Diin gilauman usab nga mokabat sa kapin 1,400 ka triathletes gikan sa nagkadaiyang mga nasod sa tinbuok kalibutan ang musalmot sa maong padula, sama sa miaging tuig.
Lakip usab sa race week ang 2GO Reyna Bulakna Run sa Agosto 7 ug ang IronKids triathlon sa Agosto 8.
Samtang, sa nasayran, nagpahigayon na og koordinasyon si IRONMAN Group General Manager Princess Galura ug Lapu-Lapu City Mayor Cindi King-Chan uban sa mga ahensya ug stakeholders aron maseguro ang malampusong pagpahigayon sa international nga dula.
Photo courtesy: Inquirer
