Gipalapdan sa Philippine Charity Sweepstakes Office (PCSO) ang ilang suporta sa serbisyo sa panglawas pinaagi sa paghatag og 18 ka Patient Transport Vehicles (PTVs) ngadto sa napulo ka probinsya sa Visayas atol sa turnover ceremony nga gihimo sa Cebu City. Tumong niini nga mapaduol ang serbisyong medikal sa katawhan, subay sa programa sa administrasyon ni Pangulong Ferdinand R. Marcos Jr.
Ubos sa Medical Transport Vehicle Donation Program (MTVDP), nakadawat og mga PTV ang mga probinsya sa Cebu, Bohol, Biliran, Leyte, Southern Leyte, Samar, Eastern Samar, Northern Samar, Negros Oriental, ug Siquijor. Gilauman nga makatabang kini sa paspas ug luwas nga pagdala sa mga pasyente ngadto sa mga ospital, ilabina sa mga hilit nga lugar.
Sa kinatibuk-an, miabot na sa 1,731 ka Patient Transport Vehicles ang naipanghatag sa PCSO sa nagkadaiyang probinsya, siyudad, lungsod, ug mga ospital sa tibuok nasod. Matod ni PCSO General Manager Melquiades A. Robles, ang maong programa nagpakita sa padayon nga paningkamot sa ahensya nga magamit ang kita gikan sa gaming operations aron mapalambo ang serbisyo ug makatabang sa mga komunidad sa panahon sa ilang panginahanglan.
Photo Courtesy: Philippine News Agency
