Nadakpan na sa kapulisan sa Tagum City, Davao del Norte ang mga responsable sa pagpamusil sa lalaking namanlas og bulawan daplin sa sapa sa Prk. 6B, Brgy. Apokon syudad sa Tagum niadtong hapon sa adlaw nga Miyerkules, Hunyo 25, 2026.
Biktima giilang si alyas Manolo, 53 anyos, dunay kapuyo, lumulupyo sa nasangpit nga lugar.
Subay sa nakuhang impormasyon atol sa gipahigayong press conference sa Davao Norte Police Provincial Office nga gipangunahan ni Provincial Director PCol Glenn G. Cristines ug OIC Chief PLtCol Edgardo Bahan sa PNP Tagum, unang nasikop ang duha ka suspek kinsa ang usa giingong mastermind o utok sa maong krimen ug ang gunman, samtang ang lain pang duha nasikop hapon sa susamang adlaw Hunyo 26, 2026 pinaagi sa gikasang hot pursuit operation.
Matud pa, personal grudge o dumot sa dugay nang panahon ang ugat sa maong pagpamusil diin diretsahan usab kining giangkon sa mismong suspek nga siya matud pa ang nagpapatay sa biktima. Hugot usab nga gibarugan sa mastermind ang alegasyon nga sa makadaghang higayon na siya “gibarang” niini ug nangilog pa sa iyang kasagingan sa nasangpit nga lugar.
Narekober sa kapulisan ang duha ka .45 kalibre nga pistola atol sa operasyon nga gituohang gigamit sa maong krimen.
Sa pagkakaron, paslak na sa bilangguan ang upat ka mga suspetsado samtang gitakda nang ipasang-at sa korte ang mga kasong tukma batok kanila.
