Nagpahayag si Senador Francis Pangilinan, og lig-on nga pagsupak sa mga panawagan nga ipaubos ang edad sa criminal liability ilabina sa mga menor de edad nga makahimo og pagpatay.
Kini human sa nahitabo nga pagpamusil sa Tacloban City diin namatay ang tulo ka mga estudyante ug adunay uban nga naangol.
Sumala kaniya, dili ang pagpaubos sa edad ang solusyon sa problema sa krimen nga naglambigit sa mga menor de edad, kundili ang pagpalig-on sa pagpatuman sa kasamtangang balaod.
Sa iyang pakig-uban sa diskusyon uban sa Juvenile Justice and Welfare Council (JJWC), gipasiugda nga ang kakulang sa suporta sa pamilya, peer pressure, kakabos, ug kahimtang sa komunidad maoy mga hinungdan sa pagkalambigit sa kabatan-onan sa krimen.
Giingon usab nga ang restorative justice system ubos sa Juvenile Justice and Welfare Act nakatabang na sa daghang batan-on nga makabangon ug makausab sa ilang kinabuhi imbis nga silotan dayon.
Photo Courtesy: Philippine News Agency
