Gianunsyo sa National Bureau of Investigation (NBI) nga mopasaka sila ug reklamong human trafficking batok kang kanhi Representative Mike Defensor tungod sa giingong konektado siya sa usa ka KTV bar sa Pasig City nga gi-raid kaniadto tungod sa giingong sexual exploitation nga mga aktibidad nga naglambigit sa dose ka mga babaye.
Matod pa ni NBI Director Melvin Matibag, atol sa press conference niadtong Miyerkules nga ipasaka ang reklamo atubangan sa Pasig City Prosecutor’s Office. Dugang pa ni Matibag nga ang mga ebidensyang ilang nahipos nagpakita matod pa, sa pagkalambigit ni Defensor sa operasyon sa maong KTV bar ug sa Bleu Hotel, diin giingong nahitabo ang mga kalihokan nga maykalabotan sa human trafficking.
Gihatagan og gibug-aton ni Matibag nga base sa ilang imbestigasyon nga gibuhat, adunay mga timailhan nga si Defensor nahibalo sa giingong trafficking operations sa maong mga establisemento.
Gani, giingong walay naglihok nga mga negosyo sa maong mga establisemento, kondili usa ka hiniusang pasilidad nga gidisenyo lamang alang sa giingong sekswal nga pagpahimulos.
Photo Courtesy: Philippine News Agency
