Mokabat sa 13,784 ka pamilya nga naapektuhan sa magnitude 7.8 nga linog niadtong Hunyo 8 sa Malapatan, Sarangani Province ang nakadawat og pinansyal nga ayuda ubos sa Emergency Cash Transfer (ECT) sa DSWD XII sugod gahapong adlawa Hunyo 23.
Matag benepisyaryo makadawat og ₱5,175 aron magamit sa pagpalit og mga materyales para sa pag-ayo sa nadaot nga atop ug dingding sa ilang mga balay, lakip na sa uban pang panginahanglan aron makabangon gikan sa epekto sa linog.
Personal nga mibisita si Loreto Jr. V. Cabaya sa mga payout site aron masiguro ang hapsay ug paspas nga pag-apod-apod sa ayuda.
Gawas sa Malapatan, padayon usab ang pagpanghatag sa ECT sa General Santos City ug Glan isip kabahin sa paningkamot sa Department of Social Welfare and Development sa paghatag dayon og tabang sa mga komunidad nga naapektuhan sa linog.
Ang maong ayuda kabahin sa padayong tubag sa gobyerno ubos sa direktiba sa pangulo aron masiguro nga dali nga makaabot ang gikinahanglang suporta sa mga pamilyang biktima sa kalamidad.
Photo Courtesy:DSWD XII
