Kabsan sa kinabuhi ang usa ka lalaki nga gikonsidera nga Top 1 Most Wanted Person sa Mati City ug Top 6 Provincial Most Wanted Person sa Davao Oriental human nga giingong misukol sa mga otoridad atol sa gipatumang operasyon sa Purok Maganda, Barangay Matiao, Mati City pasado alas 8:20 sa gabii niadtong Hunyo 19, 2026.
Ang suspetsado naila nga si alyas “Bobong,” walay trabaho ug residente sa maong lugar, kinsa nag-atubang ug kasong paglapas sa RA 9165 kun Comprehensive Dangerous Drugs Act of 2002.
Base sa report sa kapulisan, atol sa operasyon nasayran nga misukol ang suspek ngadto sa mga kapulisan nga miresulta sa pagbinayloay ug bala rason nga naigo ang suspetsado ug namatay. Human niini, gisulayan pa ang suspetsado nga dalaon sa pinakaduol nga balay tambalanan, apan gideklara na kining dead on arrival.
Samtang narekober usab sa maong operasyon ang .45 nga pistola, hand granade, mga bala, usa ka pakete sa marijuana lakip ang gidudahang shabu nga mitimbang sa 33.5 gramos ug adunay standard drug price nga P227,800.00.
Photo Courtesy: Mati CPS
