Nangayo og pasaylo ang Startista Gallery sa Star City sa singer nga si Pops Fernandez human mabatikos sa social media ang iyang life-size resin statue nga gilansad isip kabahin sa bag-ong attraction sa amusement park.
Ang estatwa ni Pops usa sa nakadawat og daghang negatibong komento gikan sa publiko human mikatap online ang mga hulagway sa mga estatuwa sa mga sikat nga personalidad. Bisan atua sa Las Vegas, dali nga nakaabot kang Pops ang kontrobersiya pinaagi sa iyang mga fans ug higala.
Misaad ang kadagkuan sa Startista Gallery nga ilang ayohon ang estatwa ug nagkuha na og bag-ong artist aron matutokan ang pag-rework sa maong obra.
Mihatag usab og reaksiyon ang anak ni Pops nga si Robin Nievera, samtang si Pops mismo mipatik sa social media og litrato niya nga adunay mensahe nga, “Sana po ganito man lang,” komento sa nahimong hitsura sa estatwa.
Sa laing bahin, gipanalipdan ni Jerry Santos, lead artist sa proyekto, ang ilang trabaho ug miingon nga nalipay ang ilang kliyente ug ang mga celebrity nga nahimong inspirasyon sa mga estatuwa, bisan pa sa mga kritisismo nga ilang nadawat online.
Photo Courtesy: PEP.PH
