Malampusong nakaagi sa Strait of Hormuz ang duha ka barkong gipadagan sa mga kompanyang South Korean human mapirmahan sa Estados Unidos ug Iran ang memorandum of understanding (MOU) alang sa ceasefire agreement niadtong miaging semana.
Sumala sa Ministry of Oceans and Fisheries sa South Korea, normal ang paglayag sa duha ka barko apan wala pa kini hingpit nga nakagawas sa gitawag nga high-risk zone sa maong lugar.
Gipatin-aw usab sa ministeryo nga walay South Korean crew nga sakay sa mga barko ug dili usab kini padulong sa South Korea.
Bisan pa niini, nagpabiling natanggong ang 22 ka barkong gi-operate sa South Korea sa Strait of Hormuz tungod sa mga kabalaka sa seguridad sa maong ruta sa kadagatan.
Ang Strait of Hormuz usa sa labing importante nga agianan sa mga barkong pangkalibutan, ilabina sa pagbiyahe sa lana ug ubang produkto gikan sa Middle East ngadto sa lain-laing bahin sa kalibutan.
Photo Courtesy: Korean Herald
