Gibutyag ni Reynaldo Roque, hepe sa Housing and Resettlement Office, nga daghan sa mga pamilyang naigo sa demolisyon sa ilang mga panimalay—ilabina kadtong adunay court order—ang nangayo og tabang alang sa relokasyon.
Matod ni Roque, kasagaran sa mga kaso nag-gikan sa mga kabalayan nga nahimutang sa Timoga sa may Paitan, ug Kalubihon, diin daghang mga panimalay ang natukod sulod sa pribadong yuta.
Gipasabot ni Roque nga ubos sa kasamtangang City Ordinance, prayoridad sa resettlement program ang mga pamilyang naapektuhan sa mga proyekto sa gobyerno, gisundan sa mga biktima sa kalamidad ug ang mga naigo sa demolisyon sa pribadong yuta maoy sunod nga prayoridad.
Gipadayag ni Roque nga adunay mga kausaban sa ordinansa pinaagi sa mga amendments nga gipangusog ni Konsehal Atty. Marlyn Young. Matod niya, sa miaging ordinansa, gikinahanglan pa ang court order isip basihan aron maapil sa resettlement program. Apan sa giusab nga lagda, dili na kini maoy nag-unang konsiderasyon.
Dugang pa ang basihan karon sa pag-assess sa kwalipikasyon mao na ang mga rekisitos ug pamalaod nga gilatid sa giusab nga city ordinance.
Tumong sa maong kausaban mao ang pagpasayon sa proseso ug paghatag og mas klarong giya sa mga pamilyang nanginahanglan og relokasyon.
