Gipatin-aw ni Police Chief Master Sergeant Reynante S. Balacuit PIO PNCO sa Davao Norte Police Provincial Office (DNPPO) ang mikatag nga video online sa alegasyong pagpangulata sa usa ka lalaki nga gidakop sa kapulisan niadtong Hunyo 21, 2026 sa hapon.
Sa pakighinabi ni PCMS Balacuit atol sa Eksklusibong programa sa Juander Radyo Tagum, Hunyo 22, 2026 gibutyag niini nga adunay nahitabong illegal drag race niadtong tungora sa Orchard Bypass Road, Brgy. La Filipina, Tagum City, ug ang maong lalaki, wala matud pay kalambigitan sa maong aktibidad, apan mihimo kinig aksyon nga naka pahinabo og komosyon hinungdan nga gibadlong sya sa kapulisan aron pakalmahon.
Samtang gi-hold sa kapulisan ang pipila ka inbibidwal nga nalambigit sa giingong drag race, gipahigayon usab ang imbestigasyon diin ang maong lalaki nga wala mailhi mingsagul ug miapil sa maong proseso. Bisan pa man, gibadlong na kini sa mga personahe sa kapulisan aron dili madelatar ang nagpadayong paghipos og impormasyon.
Apan una pa man ang maong viral video, mihimo na og pagsukol ang lalaki nga nagkanayon nga “Wala siya mahadlok sa kapulisan.” Gitulak usab niini ang pulis nga miduol kaniya aron siya pakalmahon, hinungdan nga gi-aresto kini alang sa tukma ug legal nga proseso, apan misukol ang maong lalaki rason nga gitabangan kini’g gunit aron hapsay nga madakpan taliwala sa iyang pagkisi-kisi.
Gipaklaro usab nga walay kamatuoran ang caption sa mikatag nga facebook post nga matud pa gikulata sa pulis ang maong lalaki apan ang kapulisan mituman lamang sa ilang katungdanan ug sa paagi aron mapugngan ang lalaki ug dili kini makasibat.
Human mikatag ang maong video daghang mga negatibong reaksyon sa mga netizen, samtang ubay-ubay usab ang nagpasalamat sa aksyon sa kapulisan tungod sa kasamok nga hatud sa drag race nga sagad mahitabo sa giingong lugar.
Photo Courtesy : PNP Tagum
