Giisyuhan og Letters of Inquiry (LOIs) sa Department of Trade and Industry (DTI) ang 18 ka mga negosyante sa Bukidnon human nakitaan og kalapasan sa patakaran sa presyo. Kini ang migawas nga report sa gihimo nga 2nd Quarter Meeting sa Bukidnon Provincial Price Coordinating Council (PPCC) niadtong Hunyo 11, 2026, didto sa Conference Room sa Provincial Planning and Development Office (PPDO) ning syudad sa Malaybalay
Sumala ni DTI Bukidnon Provincial Director Famelah Racquel D. Villanueva, ang maong mga LOI na-isyu hangtod niadtong Hunyo 10, aron maseguro nga mosunod ang mga patigayon sa saktong balaod ug mapugngan ang pagpanlimbong sa negosyo (unfair trade practices). Gawas niini, gipresentar usab sa DTI ang kinatibuk-ang dagan sa presyo sa mga nag-unang palitonon o basic necessities and prime commodities sa tibuok probinsya.
Nagtumong ang maong tigom sa PPCC sa pagpalig-on sa tinguha sa kagamhanan sa pagpanalipod sa mga konsumidor ug pagsiguro nga ang mga nag-unang palitonon magpabiling barato, adunay igong suplay, ug daling mapalit sa katawhan. Gitigom niini ang mga miyembrong ahensya ug mga stakeholders aron susihon ang sitwasyon sa merkado pinaagi sa pag-analisar sa datus kalabot sa implasyon, lihok sa presyo sa lana ug LPG, ug kahimtang sa suplay.
Lakip sa mga ahensya nga nagpresentar sa ilang mga report mao ang PSA, DOE, DA, NFA, DOH, DENR, PagRO, ug ang mga lokal nga Price Coordinating Councils.
Photo Courtesy: DTI – Bukidnon
