Usa ka mag-uuma sa China ang karon viral human makaplagan sa mga doktor nga dili diay ordinaryong sakit ang iyang problema sa pag-ihi—kundili usa ka bato sa pantog nga murag pang-construction ang kadako.
Sulod sa tulo ka tuig, nag-antos si Mr. Chen sa lisod ug putol-putol nga pag-ihi apan nagtuo lang siya nga normal ra nga problema sa prostate tungod sa edad.
Matod pa, usahay kinahanglan pa niyang maglihok-lihok ug posisyon aron lang maka pag-ihi.
Apan pag-abot sa ospital, natingala ang mga doktor human makita sa X-ray ang usa ka higanteng bato sulod sa iyang pantog nga adunay sukod nga 10 by 13 centimeters ug gibug-aton nga 1.3 kilos sama sa duha ka kumo sa tawong hamtong.
Tungod sa kadako niini, halos wala nay agihan ang ihi ni Chen nga maoy nagpaligro sa iyang kinabuhi.
Malampuson man nga natangtang sa operasyon ang maong bato, apan daghang netizens ang nakatawa ug niingon:“Abi nako bato sa kidney… bato diay pang hollow blocks!”
Samtang ang uban nagkomento usab: “Maayo gani kay naospital, kay basin mahimo na tong tourist spot sulod sa iyang lawas.”
Photo courtesy: Oddity Central
