Gi-file na ni Davao del Norte 2nd District Representative Jose Manuel ‘JM’ Lagdameo sa Kongreso ang House Bill 9191 niadtong Mayo 21, 2026 nga nagtumong sa pag-convert sa Munisipyo sa Santo Tomas ngadto sa usa ka component city.
Sumala sa lokal nga panggamhanan, dakong lakang kini padulong sa mas paspas nga kalamboan ug mas lig-on nga identidad sa lungsod.
Kahinumduman usab nga sa miaging courtesy visit sa mga opisyales sa LGU Sto. Tomas kang Cong. Lagdameo, diin iyang gipadayag ang suporta sa tinguha sa lungsod nga mahimong syudad.
Giila sa mga lider ang maong lihok isip resulta sa panagtinabangay ug kolektibong pangandoy sa katawhan alang sa mas maayong kaugmaon.
Kung maaprobahan ang maong giduso nga balaod, gilauman nga mosaka ang oportunidad alang sa dugang programa, proyekto, imprastraktura, ug trabaho para sa mga residente.
Giisip usab kini nga simbolo sa pagtubo ug progresong padayon nga gitinguha sa komunidad sa Sto. Tomas.
Photo Courtesy : Congressman JM Lagdameo – Aksyon at Serbisyo
