Nag-una ang probinsya sa Sarangani sa tibuok rehiyon sa SOCCSKSARGEN human makatala og impresibong 98-percent employment rate alang sa tuig 2025. Subay sa pinakabag-ong datos nga gipagawas sa Philippine Statistics Authority (PSA), natala usab sa probinsya ang labing mubo nga unemployment rate sa tibuok Region 12 nga anaa lamang sa 2-percent, diin gipasidungog sa mga opisyal ang maong kalamposan ngadto sa “ground-level economic agenda” ni Governor Rogelio “Ruel” D. Pacquiao nga nakatutok sa agri-fishery investments ug agro-industrialization.
Sumala ni Milbie Guiang-Daguro, ang Supervising Labor and Employment Officer ug Local Economic Investment Promotion Officer sa Sarangani, bisan nagpabilin nga nag-unang kontributor ang service sector, ang pagbalhin sa probinsya paingon sa heavy industry ang nahimong dako nga makina sa pagmugna og trabaho.
Giduso kini sa mga dagkong economic zones sama sa Sarangani Agro-Industrial Economic Zone sa Alabel nga nag-host sa Avia Estate township, ug ang Kamanga Agro-Industrial Economic Zone sa Maasim diin nahimutang ang 210-megawatt Sarangani Energy Corporation ug ang Panhua Integrated Steel, Inc. Gipalapdan pa ang maong industriyal nga talan-awon sa pag-abot sa Abbah King Cement Corporation, ang labing unang cement manufacturing facility sa rehiyon.
Aron masiguro nga mapadayon ang maong momentum ug dili mabiyaan ang mga lokal nga mamumuo, nilagda og Memorandum of Understanding (MOU) ang Kagamhanang Probinsyal tali sa rehiyonal nga mga buhatan sa DOLE ug TESDA.
Tumong sa maong kasabutan nga i-angay ang kahanas sa mga lokal nga trabahante ngadto sa teknikal nga pangihanglan sa mga nagsaka nga industriya aron epektibong masulbad ang problema sa labor mismatch. Gi-emphasized ni Daguro nga kini nga pamaagi dili lamang makadani og dugang investors, kondili magseguro usab nga ang paglambo sa ekonomiya sa Sarangani mapadayunon (sustainable) ug inklusibo alang sa tanan.
Photo Courtesy:Sarangani Provincial Information Office
