Gatusan ka mga residente ang nanghikling human apektado sa sunog, nga nahitabo sa Sitio Silangan, Barangay Tejero niadtong Sabado sa gabii, Mayo 16, 2026,
Base sa report nakatala ang mga awtoridad og 134 ka apektadong balay, lakip na ang 120 ka balay nga hingpit nga nasunog ug 14 ka balay nga adunay partial damage.
Mikabat sa 247 ka pamilya o mga 945 ka indibidwal ang naapektuhan sa insidente. Lakip sa mga naapektuhan mao ang 71 ka sharers ug 40 ka renters, samtang 11 ka lodgers usab ang naapil sa kinatibuk-ang gidaghanon sa mga napahawa. Gituohang nagsugod ang sunog mga alas 7:05 sa gabii.
Personal nga mibisita si Cebu City Mayor Nestor Archival sa lugar sa sunog aron susihon ang sitwasyon ug monitoron ang nagpadayong relief efforts uban sa Department of Social Welfare Services.
Ang mga napahawa nga residente karon temporaryong nagpabilin sa Tejero Elementary School Gym nga gihimong evacuation center.
Nasugdan na usab sa Cebu City Government ang pagrehistro sa mga internally displaced persons (IDPs) ug nagpadayon sa paghatag og pagkaon alang sa mga apektadong pamilya.
Matud sa mga awtoridad, himuon ang validation ug verification sa mga naapektuhang residente sa ikaduhang adlaw human sa insidente.
Girekomendar usab ang paghatag og financial assistance pinaagi sa disaster account lakip ang relief goods, housing materials, bugas, ug nagkadaiyang food items alang sa mga apektadong pamilya.
Photo courtesy: Cebu Fire Updates
