Patay sa nahitabong pagpamusil, tungod sa dugay nang panagbangi sa yuta, ang tag-iya sa electrical supply sa Bontao Street, Barangay 8, Malaybalay City, Bukidnon sa may alas 10:12 sa buntag Mayo 15, 2026.
Giila ang biktima si Benjamin Dela Cruz 74-anyos, ug residente sa lugar kinsa nakahiagom ug igo pinusilan sa ulo ug sa uban pang bahin sa iyang lawas nga gidala pa sa Polymedic Hospital sa Malaybalay City apan wala na nasalbar.
Lakip sa napusilan ang security guard sa maong establisyemento 25-anyos nga taga Encalbog, Barangay Can-ayan, kinsa dunay igo sa tuong siko hinuon anaa ra sa luwas nga kahimtang.
Nasayran sa imbestigasyon sa kapolisan, nga ang biktima ug ang suspetsado nagkalalis sulod sa hardware store nga gipanag-iyahan sa biktima, nga misangpot sa init nga komprontasyon hinungdan sa pagpamusil gamit ang calibre 45 nga armas.
Nailhan ang suspetsado nga pag-umangkon ra sa biktima 43-anyos, ug residente sa Block 5, Arriola Compound, Nivel Hills, Busay, Cebu City (base sa iyang balidong driver’s license).
Dali usab nasikop ang nahisgutang suspect ug kasamtangang anaa sa kostodiya sa Malaybalay City Police Station kinsa mag-atubang sa kasong Murder ug Frustrated Homicide.
Photo Courtesy: Malaybalay City Police Station
