Gikumpirma sa 11 ka miyembro sa House prosecution panel, nga motambong sila sa pag-convene sa Senate impeachment court sa Mayo 18, alang sa impeachment trial ni Vice President Sara Duterte.
Matod ni Bicol Saro Partylist Rep. Terry Ridon, andam na ang prosecution panel ug padayon na ang ilang pagpangandam human mapadala sa Kamara ang Articles of Impeachment ngadto sa Senado.
Sumala pa ni Mamamayang Liberal Partylist Rep. Leila de Lima, nga gibahin na sa mga team ang trabaho base sa upat ka articles of impeachment aron mas mapaspas ang pag-andam sa ebidensya, dokumento ug mga testigo.
Gipasabot usab ni Akbayan Partylist Rep. Chel Diokno, nga kinahanglan mapamatud-an sa prosecution ang matag alegasyon batok sa bise presidente.
Samtang si Manila 3rd District Rep. Joel Chua, maoy motan-aw sa mga reklamo kalabot sa giingong sayop nga paggamit sa confidential funds, unexplained wealth ug bribery allegations.
Bisan pa sa tensyon nga nahitabo sa Senado, nagtuo ang prosecution panel nga dili kini makaapekto sa impeachment proceedings.
Giingon usab nila, nga responsibilidad na karon sa Senado ang pagpahigayon og patas ug paspas nga pagdungog sa kaso.
Samtang, giingon nila Rep. De Lima ug Rep. Diokno nga si Senator Ronald dela Rosa dili unta moapil sa impeachment trial tungod sa warrant of arrest nga gi-isyu sa International Criminal Court batok kaniya.
Photo Courtesy: Rappler/ House of Representatives
