Nagpaayo pa karon sa hospital ang driver ug helper sa usa ka 10-wheeler truck nga nabaliskad kagahapon pasado alas 7 sa buntag, Mayo 14, 2026 didto sa National Highway, Barangay Poblacion, Makilala, Cotabato, human sila nakaangkon og physical injuries tungod sa nahitabong self-accident.
Giila ang driver sa maong truck nga si Roel Valenzona, 34-anyos, biyudo ug residente sa Barangay Carmen, Davao del Norte, ug ang iyang helper giila nga si John Bryan Ocon, 34-anyos ug lumulupyo sa Barangay San Roque, Panabo City.
Matod ni Romel Diaman, kauban sa trabaho sa mga biktima ug saksi sa panghitabo, gikan sa Panabo City ang 10-wheeler truck nga adunay plate number nga L.A.O. 8559, ug aduna kini mga karga nga construction materials, paingon sa Midsayap, Cotabato. Gikan sa pa Barangay Malasila, wala na mogana ang brake sa truck, ug pag-abot sa bahin sa highway duol sa 39th Infantry Battalion Philippine Army sa Poblacion, Makilala, nawad-an na kini og kontrol ug nabaliskad.
Tungod sa kusog nga impact sa self-accident, nakaangkon og mga samad ug bun-og sa kalawasan ang duha ka biktima, hinungdan nga gidala dayon kini sa Makilala hospital aron matambalan. Sa kasamtangan, luwas na kini sa peligro.
