Gitanggal na sa Pilipinas ang import ban sa poultry gikan sa California, USA, nga una nang gipahamtang tungod sa kahadlok sa bird flu.
Sumala sa Department of Agriculture (DA), gipagawas nila ang Department Circular No. 21 human makadawat og report gikan sa US veterinary authorities nga gisumite sa World Organisation for Animal Health (WOAH), nga nagkumpirma nga ang tanang kaso sa Highly Pathogenic Avian Influenza (HPAI) sa California nahuman na ug nare-resolve na.
Ang una nga import restriction naglakip sa domestic ug wild birds, ug mga produkto sama sa poultry meat, day-old chicks, itlog, ug semilya.
Giingon ni Agriculture Secretary Francisco Tiu Laurel Jr. nga ang pag-alsa sa ban magpasig-uli sa trade ug makatabang sa pagsuplay sa merkado, samtang nagapadayon ang pagpanalipod sa local agriculture.
Matod pa sa DA, ang pagbalik sa importasyon gikan sa California gilauman nga makatabang sa pag-stabilize sa presyo ug suplay sa poultry sa nasod nga naapektuhan sa temporaryong paghunong sa import.
Giingon usab sa ahensya nga magpadayon sila sa pag-monitor sa global HPAI situation ug magpatuman og istrikto nga biosecurity measures aron maprotektahan ang local poultry industry.
Photo Courtesy: wikipedia
