Gipasabot ni Senior Labor Officer Jessa Jorquia nga ang programang “JobStart” sa Department of Labor and Employment o DOLE gitumong aron maandam ang mga kabataang edad 18 hangtod 24 anyos alang sa panarbaho pinaagi sa mga training ug internship opportunities.
Sa pagkakaron, adunay 66 ka mga benepisyaryo nga kabataan nga wala sa trabaho, edukasyon, ug training o NEET nga naapil sa maong programa.
Sumala kaniya, adunay tulo ka hugna ang JobStart program nga naglangkob sa soft skills training, technical training, ug internship. Sa unang hugna, ginatudloan ang mga partisipante og interpersonal skills ug hustong pamatasan sa trabaho samtang makadawat og allowance.
Mosunod niini ang technical training ug internship sulod sa mga partner nga kompanya diin makadawat usab sila og dugang nga benepisyo ug sweldo
Dugang pa ni Jorquia, human sa unang hugna magpahigayon usab og mini-job fair aron ang mga employers mismo mopili sa mga partisipante nga ilang dawaton alang sa dugang training ug trabaho.
Gilauman sa DOLE nga pinaagi sa JobStart program mas mudaghan ang kabataang makakita og permanenteng trabaho ug mahatagan og mas maayong kaugmaon
Photo Courtesy: DOLE Bukidnon
