Gipahibalo sa Department of Health (DOH) Region 9 ang dakong pagpalapad sa Philippine Multisectoral Nutrition Project (PMNP) sa tibuok Zamboanga Peninsula sugod 2027 hangtod 2031 isip kabahin sa kampanya batok sa malnutrition ug child stunting.
Ang programang gitawag og “PMNP Connect” maglangkob sa 73 ka munisipalidad sa Zamboanga Peninsula, lakip ang mga lugar nga adunay taas nga poverty incidence ug stunting rates.
Ang proyekto gipatuman uban sa World Bank ug UNICEF aron mapalambo ang nutrisyon sa kabataan ilabi na sa unang 1,000 ka adlaw sa ilang kinabuhi.
Matod ni Cheryl Sarmiento Medical Officer IV sa DOH-9, importante ang kooperasyon sa gobyerno, lokal nga komunidad ug pamilya aron masiguro ang himsog nga kaugmaon sa mga bata.
Base sa datos sa DOH 9, mikunhod na ang kaso sa stunting, underweight ug uban pang nutrition problems sa mga lugar nga una nang nasakop sa programa tali sa 2024 ug 2025.
Kabahin usab sa proyekto ang paggamit og tablets sa Barangay Health Workers aron mas sayo matutokan ang mga batang posible nga maapektuhan sa malnutrition ug mahatagan dayon og angay nga tabang.
PHOTO COURTESY: DOH Zamboanga Peninsula CHD
