Gi-lockdown sa mga otoridad sa France ang usa ka cruise ship human namatay ang usa ka 90 anyos nga pasahero ug daghang mga tawo ang nagkasakit atol sa biyahe. Ang barko nakaangkla sa siyudad sa Bordeaux niadtong Miyerkules ug adunay kapin 1,700 ka pasahero ug crew sakay niini.
Matod sa report, kapin 50 ka tawo ang nakasinati og sakit sa tiyan, pagsuka ug kalibanga. Kadaghanan sa mga pasahero gikan sa Britain ug Ireland samtang daghang crew members mga Indian nationals. Ang 90-anyos nga pasahero namatay sa wala pa makaabot ang barko sa pantalan sa Brest sa France.
Gisusi dayon sa mga health officials kung adunay outbreak sa sakit sama sa norovirus o hantavirus. Apan base sa unang eksaminasyon, wala’y ebidensya nga adunay norovirus ug wala usab konektado sa hantavirus nga nadungog sa laing cruise ship.
Padayon pa ang dugang imbestigasyon aron mahibal-an ang tinuod nga hinungdan sa sakit. Posible usab nga food poisoning ang nakaapekto sa mga pasahero. Bisan sa lockdown, wala’y hugot nga seguridad nga gibutang palibot sa barko samtang nakaangkla kini.
Photo Courtesy: SCMP
