Nagpagawas og public advisory ang Philippine Statistics Authority batok sa nagkuyanap nga mga video sa social media nga nag-ingon nga ang tanang adunay National ID makadawat matod pa og cash o rice subsidy ug libre nga kuryente matag bulan.
Gipasabot sa PSA nga walay kamatuoran ang maong impormasyon ug wala kini naggikan sa ilang ahensya o bisan unsang lehitimong opisina sa gobyerno.
Dugang pa, posible matod pang gigamitan og Artificial Intelligence (AI) ang pipila ka mga video aron makapakaylap og sayop nga impormasyon ug makailad sa publiko.
Gipahinumdoman usab sa PSA nga ang National ID usa lamang ka opisyal nga valid ID ug dili pasabot nga awtomatikong makadawat og ayuda ang usa ka tawo.
Ang paghatag sa benepisyo magdepende gihapon sa mga kwalipikasyon ug polisiya sa matag ahensya nga nagpatuman sa programa.
Giawhag sa PSA ang publiko nga likayan ang pag-share o pagtuo dayon sa mga kadudahang post online ug mosalig lamang sa official social media accounts sa PSA PhilSys alang sa husto ug opisyal nga impormasyon.
Photo Courtesy : Philippine Statistics Authority
