Patay ang usa ka 43-anyos nga asawa human gidunggab sa iyang mismong bana tungod sa selos sa Christian Village, Barangay Aplaya, Digos City. Ang biktima giila nga si alyas “Jocelyn,” samtang ang suspetsado mao si alyas “Muhaliden,” 41-anyos ug bana sa biktima.
Base sa inisyal nga imbestigasyon sa kapulisan, nahitabo ang insidente alas 8:50 sa gabii atol sa gamayng selebrasyon sa adlawng natawhan sa biktima. Kalit nag-away ang magtiayon human madudahan sa suspetsado nga adunay laing lalaki nga gikarelasyon ang iyang asawa.
Tungod sa grabeng kasuko, mikuha matod pa, og kutsilyo ang suspetsado ug gidunggab ang biktima og walo ka beses. Dali nga gidala sa Davao del Sur Provincial Hospital ang biktima apan gideklarang patay sa attending physician tungod sa grabeng samad nga naangkon.
Sa pagkakaron, anaa na sa kustodiya sa Digos City Police Station ang suspetsado ug posibleng kasong parricide ang iyang atubangon.
Photo Courtesy: Ada Derana
