Nasikop sa mga kapulisan sa Barobo Municipal Police Station (MPS) ang usa ka high-value suspect human nakuhaan og kapin PHP 54,000 nga kantidad sa gituohang shabu ug ilegal nga armas atol sa gihimong search warrant operation niadtong gabii sa Marso 6, 2026.
Giila ni PCOL JEFFREY LAWRENCE D. MAURICIO, Provincial Director sa Surigao del Sur Police Provincial Office (SDSPPO), ang suspek pinaagi sa alyas nga “Pocho,” 38-anyos, ug residente sa Purok 6, Barangay Poblacion, Barobo. Ang maong dinakpan gikonsiderar nga usa ka bag-ong nailhan nga Street Level Individual (SLI) pusher sa maong dapit.
Gilusad ang maong operasyon bandang alas 9:30 sa gabii sa Purok 6 ubos sa pagpanguna sa Barobo MPS sa pagdumala ni PMAJ Ralph Alexis O. Avenido, Acting Chief of Police. Nakig-alayon usab sa maong lakang ang mga personahe gikan sa 14th SAC, 1st SAB, ug Regional Intelligence Unit (RIU) 13, PIT-SDS aron ipatuman ang Search Warrant nga gi-isyu niadtong Marso 2, 2026, sa Regional Trial Court (RTC), 11th Judicial Region, Branch 41, Cantilan, Surigao del Sur.
Narekober gikan sa posisyon sa suspek ang 16 ka heat-sealed transparent plastic sachets nga adunay sulod nga gituohang shabu nga motimbang og 8.08 gramos ug nagkantidad og PHP 54,944.00. Nakuha usab gikan kaniya ang usa ka yunit sa .38 caliber revolver nga loaded og dose (12) ka mga bala.
Gipasabot ni PCOL MAURICIO nga ang maong kalamposan usa ka kamatuoran sa gipakusgan nga intelligence-driven operations sa kapulisan batok sa ilegal nga droga ug loose firearms. Gipasalig sa opisyal nga magpabiling lig-on ang ilang baruganan sa pagpanalipod sa kalinaw ug kahusay sa tibuok Surigao del Sur.
Gipahibalo na ang suspek sa iyang mga katungod ubos sa Miranda Doctrine ug Anti-Torture Act samtang kasamtangan kining anaa sa kustodiya sa Barobo MPS. Gikatakdang atubangon sa dinakpan ang mga kasong paglapas sa Republic Act 9165 (Comprehensive Dangerous Drugs Act of 2002) ug Republic Act 10591 (Comprehensive Firearms and Ammunition Regulation Act).
Photo courtesy: SDSPPO
