Nadakpan sa kapulisan ang usa ka 39-anyos nga tricycle driver atol sa operasyon batok sa ilegal nga sugal human kini nasakpan nalambigit sa ilegal nga sabong o mas nailhan nga “tari-tari” sa Purok Tabing Ilog, Barangay Balangasan, Pagadian City, niadtong adlawng domingo, Marso 8, 2026.
Sa imbestigasyon sa kapulisan, eksaktong alas 10:15 sa buntag sa dihang gipahigayon sa mga personnel sa Pagadian City Police Station ang operasyon nga misangpot sa pagdakop sa suspetsado nga naaktuhan mismo sa maong ilegal nga kalihokan.
Narekober gikan sa suspetsado ang pito ka gaff knives o “bulang,” upat ka pisi o “gabhot,” electrical tape, usa ka sling bag, usa ka gaffing blade holder, ug duha ka manok panabong.
Human sa operasyon, gidala ang suspetsado uban ang mga nakompiskar nga ebidensya sa Pagadian City Police Station alang sa dokumentasyon ug hustong disposisyon.
Samtang giandam na sa kapulisan ang kaso batok sa suspetsado may kalabutan sa paglapas sa Presidential Decree 449 nga may kalabutan sa PD 1602 o Illegal Gambling Law.
Photo Courtesy: PPI News Commons
