Nagpadayon sa pagpalig-on sa kampanya batok sa agricultural sabotage ang 2nd Davao Norte Provincial Mobile Force Company pinaagi sa pagpasabot sa publiko mahitungod sa Republic Act No. 12022.
Ang maong kalihukan gipangulohan ni Kristopher A. Sabsal, Force Commander sa unit, isip kabahin sa paningkamot sa kapulisan nga maprotektahan ang sektor sa agrikultura ug masiguro ang food security sa komunidad.
Sumala sa kapulisan, ang balaod nagtumong sa pagbatok sa mga ilegal nga kalihukan sama sa smuggling, hoarding, ug manipulasyon sa presyo sa mga produktong agrikultural nga makadaot sa panginabuhian sa mga mag-uuma.
Pinaagi sa pagpaabot sa hustong impormasyon sa katawhan, gilauman nga mas masabtan sa publiko ang mga silot ug responsibilidad ubos sa maong balaod.
Gipasiugda usab sa kapulisan nga importante ang kooperasyon sa komunidad aron mapugngan ang mga kalihukang makadaot sa sektor sa agrikultura. Ang pagpalambo sa kahibalo sa balaod giisip nga dakong lakang aron maprotektahan ang mga mag-uuma ug masiguro ang lig-on nga suplay sa pagkaon sa nasud.
Photo Courtesy : DNPPO
