Gipamahayag ni PNP Chief Gen. Jose Melencio Nartatez Jr. nga naghimo na sila og mga proactive nga lakang aron masiguro nga ang tanang impormasyon, apil na ang mga plano kalabutan sa kalinaw, kahapsay ug nasudnong seguridad, ang magpabiling protektado.
Gihingusgan sa Philippine National Police (PNP) ang lakang niini sa counter-intelligence sa tanang unit aron nga malikayan ang espionage o pang-espiya sa han-ay sa kapulisan.
Nasayran nga adunay tulo ka Pilipino ang nalambigit sa isyu sa pag-espiya alang sa China, kung asa ang duha niini nag nagtrabaho sulod sa Department of National Defense (DND) ug sa Philippine Navy, samtang ang usa ang duol matud pa sa usa ka opisyal sa Philippine Coast Guard (PCG).
Dugang pa ni Nartatez nga bisan na-neutralize na ang espionage network sa nasud, nagpabilin pa gihapon nga proactive ug vigilant ang organisasyon sa kapulisan.
Dugang pa niini nga, nakig-alayon na usab ang PNP sa National Security Council (NSC) ug uban pang intelligence agencies aron mapakusgan pa ang bayloay og impormasyon.
Nagpahayag usab og suporta si Nartatez sa posisyon sa NSC ug sa Armed Forces of the Philippines (AFP) nga pakusgon ang legal ug institutional frameworks nga magprotekta sa nasudnong seguridad dungan na usab sa nagpadayon nga bahad, hilabina sa paspas nga ebolusyon sa teknolohiya.
Photo Courtesy: Manila Bulletin
