Dakpan ang usa ka lalaki nga laborer kinsa nagpayuhot sa ginadiling drogang shabu pinaagi sa gilusad nga drug buy-bust operation sa kapulisan sa Piñan Public Cemetery, Purok 3, Barangay Poblacion South, lungsod sa Piñan, Zamboanga del Norte niadtong Marso 5, 2026.
Giila ang dinakpan nga si alyas Dindo, 39-anyos, ug residente sa Purok Eco 5, Curvada, Barangay Galas, Dipolog City.
Narekober gikan sa dinakpan ang usa ka gamay nga pakete sa shabu nga nagsilbing buy-bust item ug duha pa ka gagmayng pakete sa shabu nga nakuha gikan sa iyang posisyon, buy-bust money ug uban pang mga non-drug items. Motimbang sa 1 ka gramo ang nasakmit nga druga nga nagkantidad ug Php6,800.00.
Balhog sa selda sa Piñan Municipal Police station ang suspetsado ug mag-atubang sa kasong paglapas sa RA 9165 kon Comprehensive Dangerous Drugs Act of 2002 samtang ang mga ebidensya iturnover ngadto sa Zamboanga del Norte Provincial Forensic Unit, Liloy Satellite Office alang sa laboratory examination.
