Patay ang usa ka babaye, human kining gipusil sa Purok Lily, Brgy. Poblacion, Matalam, Cotabato, alas 11:57 sa buntag niadtong Enero 26, 2026. Giila ang biktima nga si Hannah Buat nga mas nailhang Bai Dulao, 26-anyos.
Sa taho nga gipagula sa Matalam Municipal Police Station, nakuha sa CCTV ang duha ka wala mailhing lalaki nga suspek nga nipusil sa biktima, samtang sulod sa usa ka mini-boutique, nga daling nisibat human sa insidente.
Gidala pa sa balay tambalanan ang biktima human sa panghitabo apan gideklarar kining patay, samtang ang iyang 2-anyos nga anak nga babaye nga nakaangkon og samad pinusilan kasamtangang nagpaalim sa Cotabato Provincial Hospital.
Gipasalig sa Matalam MPS sa publiko ang usa ka hingpit nga imbestigasyon ug himoon ang tanan nga kinahanglan nga aksyon, aron mapasakahan og kaso ang mga suspetsado.
