Gikataho sa Malacañang kagahapong adlawa, Biyernes Oktubre 24 nga giduso ni Presidente Ferdinand R. Marcos Jr. nga palig-onon ang depensa aron mapanalipdan ang teritoryo sa Pilipinas, ilabina sa nagkataas nga tensiyon sa rehiyon.
Ang pamahayag giluwatan human gibutyag ni Defense Secretary Gilberto Teodoro niadtong Huwebes nga ang Presidente mipagawas ug direktiba sa pag-usab sa depensa sa ekosistema sa nasud. Kini nga desisyon nahimo ni Marcos tungod kay ang nasud sa pagkakarun anaa sa mga hulga nga sitwasyon ilabina sa mga ilegal nga aksyon sa China sa West Philippine Sea.
Matod ni Teodoro nga ang Department of National Defense mag-una sa pagpalambo sa mga estratehikong base ug musagop sa government-to-government arrangements alang sa defense procurements ug joint industrial production.
Kalabot niini, si Palace Press Officer Claire Castro mipadayag pag-usab sa pasalig sa Presidente alang sa pagpanalipod soberanya sa nasud. Gani, dugang pa niini nga ang maong lakang makapalambo usab sa kolaborasyon sa mga nasud nga adunay parehas nga mga mithi ug katuyoan.
Dugang pa ni Castro nga dili lamang kini mahitungod sa pagsiguro sa mga utlanan sa Pilipinas kundili mahitungod usab kini sa pagpausbaw sa internal nga kalig-on.
Photo Courtesy to:PNA
