Giklaro sa Korte Suprema nga ang patas nga kompensasyon sa mga kaso sa pagpangilog sa yuta kinahanglang ibase dili lang sa market value sa yuta.
Sa desisyon nga gisuwat ni Associate Justice Samuel Gaerlan, gibalik sa Korte Suprema ngadto sa Regional Trial Court ang kaso tali sa City Government of Pasay ug Arellano University. Ang katuyoan niini mao ang subling pagtimbang sa kantidad sa bayronon sa unibersidad.
Nagsugod ang kaso sa dihang gigamit sa LGU sa Pasay ang 805-square-meter nga yuta sa Arellano University sa Barangay San Isidro isip usa ka pampublikong dalan nga karon gitawag og Menlo Street nga walay saktong proseso sa pagkuha ug pagbayad.
Matod sa Korte Suprema, dili igo nga ibase lang ang bayronon sa 1978 assessment sa City Assessor. Kinahanglang tagdon sa mga korte ang tanang sirkumstansya, sama sa zonal valuation sa BIR, lokasyon, gidak-on, klasi sa yuta, ug kasamtangang bili sa susamang kabtangan.
Dugang pa sa Korte nga bisan tuod ang tax assessment mahimong gamiton isip giya, dili kini mahimong bugtong basehan sa pagdetermina sa tukmang pagbayad.
Gisuportahan usab sa Korte Suprema ang paggamit sa 6% nga tinuig nga interes, base sa rate sa Bangko Sentral ng Pilipinas.
Sa maong desisyon, gisubli sa Korte Suprema nga ang hustisya sa mga kaso sa pagkuha sa yuta kinahanglang kompleto, matinud-anon, ug patas alang sa mga katawhan ug sa estado.
Photo courtesy to:SUPREME COURT
