Hingusgan sa Philippine National Police (PNP) ang crowd monitoring ug pagbantay sa online threats isip kabahin sa ilang pagpangandam sa Undas karong tuiga.
Matod ni Acting PNP Chief PLtGen. Jose Melencio Naratatez Jr., ang ilang han-ay mopalapad pa sa pagbantay sa seguridad lakip na sa publikong cyberspace security.
Dugang pa nga base kini sa direktiba kaniya gikan ni Presidente Ferdinand Marcos Jr. Gipahugtan usab sa hepe ang seguridad kung asa dili lang ibutang sa mga pisikal nga lugar kon dili lakip na sa mga digital space tungod sa pagkaylap sa mga bakak nga impormasyon o mga scam nga paspas nga mikaylap.
Tungod niini, gitahasan dayon ni Nartatez ang Anti-Cybercrime Group nga ilhon ug patubagon ang mga nagpakatap og peke nga advisories, phishing messages ug uban pang online scam aron mamintina ang kahapsay ug kaluwasan.
Gawas niini, gipalig-on usab ang paggamit sa teknolohiya sama sa CCTV networks, drone footages ug uban pa nga daling makaila sa mga real-time nga kalihukan sa transport terminals ug bisan sa mga sementeryo.
Samtang, gikatakda usab nga magbutang og police assistance desks, patrol teams ug traffic management units ang National Police aron mahatagan kini og ayuda nga gikinahanglan sa publiko karong Undas 2025.
Photo courtesy to:X
