Nagmando ang National Disaster Risk Reduction and Management Council (NDRRMC) sa mga lokal nga kagamhanan nga magpahigayon og infrastructure audit ug magpasiugda og regular nga earthquake drills isip pagpangandam sa mga katalagman, labi na sa linog.
Sa memorandum nga gi-isyu ni NDRRMC Chairman ug Department of National Defense (DND) Secretary Gilberto Teodoro, gilatid nga ang mga ahensya, kauban ang lokal nga kagamhanan, kinahanglang modumala niining mga assessment aron maseguro nga mamahimong maayo ang pagbantay sa posibleng kadaot inig-igo sa linog sa nasud.
Nakasulat usab sa memo nga kinahanglan palig-onon ang mga paningkamot sa Public Information aron malikayan ang pagpakaylap ug paghatag og panic ug stress sa publiko tungod sa mga sayop nga impormasyon.
Gawas pa niini, kinahanglan usab nga magbaton og hugot nga koordinasyon ang mga regional DRRM offices sa Philippine Institute for Volcanology and Seismology (Phivolcs) alang sa teknikal nga suporta nga gikinahanglan inig-abot sa panahon.
Sa laing bahin, sa sayo pa niini, gireview na ni Teodoro ang mga contingency plans sa mga lokal nga kagamhanan aron maseguro nga updated kini.
Photo courtesy: PNA
