Gipaabot ni Konsehal Al Legaspi ngadto sa hawanan sa konseho ang nagabalik-balik nga problema sa mga pipelines sa Cagayan de Oro City Water District nga adunay mga leaking.
Gipananglitan ni Konsehal Legaspi ang kahimtang sa Zone 5 ug 6 sa Barangay Bulua, kung asa nagsugod ang leaking sa tubig gikan buntag hangtud na sa gabie nga ning banaw sa kalsada. Gawas sa daghang tubig ang nanga-usik matag adlaw, naghatag sab kinig kahasol sa mga motorista nga molabay sa nahisgutang kalsada ug nagresulta usab sa pagkadisgrasya sa uban.
Gisugyot sab ni Konsehal Legaspi nga i-refer kini nga problema ngadto sa komitiba sa public utilities aron nga matuki ug mapalawman kini nga hisgutanan.
Apan, gipunting sab ni Konsehal Yevonna Yacine Emano nga dili lamang sa Barangay Bulua ang adunay susamang problema tungod nahitabo kini sa tibuok syudad. Dugang ni Emano nga anaa sa 50-60% ang non-water revenue nga nagpasabot nga daghang leaking sa linya sa tubig sa COWD kung asa ang mga konsumante ang nag-abaga sa pagbayad niini.
Giuyonan sab ni Konsehal Eric Salcedo, chairman sa komitiba sa public utilities ang obserbasyon sa iyahang mga kaubanang konsehal. Busa, panahon na aron nga ipatawag ang COWD ug uban pang water service provider tungod sa balik-balik nga reklamo sama sa leaking nga mga linya sa tubig apan kuwang sa aksyon. Gikonsidera sab ang sugyot nga pagpahamtang og penalty kanila tungod sa kawalay aksyon sa mga reklamo sa mga konsumante.
Photo courtesy: COWD
