Gisiguro sa Malacañang nga padayon ang Department of Social Welfare and Development (DSWD) sa pag-replenish ug pagmintinar sa igo nga relief supplies alang sa mga apektadong residente sa bag-ong linog ug bagyo. Kini human sa mando ni Presidente Ferdinand R. Marcos Jr. nga siguruhon nga walay Pilipinong magutman sa panahon sa mga kalamidad ug emerhensya.
Sa Palace briefing, gibutyag ni Presidential Communications Undersecretary ug Palace Press Officer Claire Castro nga gipasabot ni Marcos Jr. nga kinahanglan nga magpadayon ang produksyon ug distribusyon sa relief goods aron masuportahan ang mga komunidad nga nanginahanglan. Dugang pa ni Castro nga maski sunod-sunod ang mga kalamidad, andam ang DSWD sa pagtubag sa mga panginahanglanon sa katawhan.
Alang sa mga biktima sa Bagyong Ramil, giandam na sa DSWD ang duha ka milyon ka family food packs ug kapin PhP720,000 nga kantidad sa ayuda alang sa mga lugar nga grabe ang kadaot. Dugang pa niini, adunay kapin PhP169-M nga standby funds nga gitagana aron masuportahan ang nagpadayon nga disaster response operations sa mga rehiyon nga naapektuhan.
Sumala pa sa DSWD, nakapangapod-apod na sila og 382 ka family food packs ug 547 ka kahon sa ready-to-eat food nga nagkantidad og PhP720,925 isip inisyal nga tabang. Gihatagan usab og pagkaon ang mga pasahero nga na-stranded sa Bicol region tungod sa kanselasyon sa biyahe sa kadagat. Gisuportahan usab sa ahensya ang mga residente sa Sorsogon diin unang mi-landfall ang Bagyong Ramil.
Base sa report sa DSWD, tibuok nasud adunay 14,500 ka pamilya o 30,368 ka indibidwal nga naapektuhan sa bag-ong bagyo. Ang mga lugar nga labing naapektuhan mao ang mga probinsya sa Cagayan Valley, Central Luzon, Bicol Region, ug Western Visayas.
Samtang gipangayo sa gobyerno ang kooperasyon sa tanan aron mapadayon ang koordinasyon ug masiguro nga ang tanang apektado makadawat dayon sa gikinahanglan nga tabang.
Photo courtesy: Presidential Communications Office
