Nasikop sa mga otoridad ang usa ka indibidwal kinsa nagkupot ug illegal nga armas atol sa gikasang operasyon didto sa Sitio 5M, Brgy. Caatihan, Boston, Davao Oriental pasado alas 12:10 sa kadlawon niadtong Oktubre 18, 2025.
Ang operasyon gipangunahan sa mga personahe sa Boston Municipal Police Station ug sa mga sakop sa RPSB Cluster-1 nga nagresulta sa pagkasikop ni alyas “Along”, 36 anyos, adunay asawa, usa ka laborer ug residente sa maong lugar.
Naaresto ang suspek pinaagi sa pagpatuman sa Search Warrant number 314-314-2025 nga giisyu ni Judge Semiramis Bituin C Castro sa Regional Trial Court, Mati City, Davao Oriental ug narekober gikan sa iyang posisyon ang usa ka unit sa 45 caliber Colt MK IV pistol nga adunay serial no. 888130, duha ka .45 magazines ug 13 ka piraso sa buhing bala.
Gimarkahan ug giimbentaryo dayon sa lugar sa nahitaboan ang nasakmit nga mga ebidensya uban sa mga testigo ug sa suspek mismo subay sa balaod. Gipahibalo usab ang dinakpan sa rason sa iyang pagkasikop pinaagi sa pinulongan nga iyang nasabtan.
Sa karon ang suspetsado gikustodiya na sa Boston Municipal Police Station alang sa tukmang disposasyon ug mag atubang sa kasong paglapas sa Republic Act No. 10591 o Comprehensive Firearms and Ammunition Regulation Act.
Photo courtesy to: Bostonpcr Davnor
