Gihatagan ug gibug-aton ni PMAJ. Rodulfo Arañador Jr., Officer-in-Charge sa Iligan City Police Station 1, ang dakong papel sa katawhang Iliganon sa pagpabilin sa kahusay ug kalinaw sa dakbayan.
Sa eksklusibong pakighinabi sa Juander Radyo News Team, gipasabot ni Pmaj. Arañador nga ang kooperasyon sa publiko ilabina ang pagreport sa mga ilegal nga kalihokan sama sa pot session , maoy labing epektibong paagi aron mapukan ang kriminalidad.
Giila usab sa kapulisan ang hulga nga dala sa droga nga nag-unang hinungdan sa daghang krimen sa syudad. Hinungdan nga ilang gi-awhag ang publiko nga magmatngon ug ipahibalo dayon sa mga otoridad ang bisan unsang kadudahang lihok sa ilang palibot.
Tungod sa umaabot nga kasaulogan sa kapistahan ug sa Dyandi Festival sa Iligan , mas gipahugtan karon sa mga operatiba sa Iligan City Police Station 1 ang seguridad aron masiguro ang luwas ug malinawon nga pagselebrar sa katawhan ug mga bisita.
Matud pa ni Arañador nga sa hugot nga pagpatuman sa balaod ug tabang sa katawhan, mas malauman ang seguridad sa Iligan.
