Gisang-at na sa Office of the Ombudsman for Mindanao ang reklamong kriminal ug administratibo batok sa kapin 40 ka opisyal ug miyembro sa kapulisan sa Cotabato Province, may kalabotan sa duguong operasyon sa search warrant sa compound ni Don Ramon N. Floresta sa Barangay Bulacanon, Makilala, Cotabato niadtong Agosto 14, 2024, diin duha sa iyang mga security aide ang napatay.
Nahimong pormal ang reklamo nga gisang-at ni Regina E. Pedroso ug Floresta, gahapong adlawa Septyembre 17, 2025. Apil usab sa reklamo ang ubang miyembro sa Provincial Intelligence Unit ug assault team nga miapil sa operasyon, lakip ang daghang mga opisyal ug personahe sa kapulisan.
Ang mga gikatahong kaso naglakip sa duha ka ihap sa Murder ubos sa Article 248 sa Revised Penal Code, Obstruction of Justice (P.D. 1829), paglapas sa Articles 128 ug 129 sa Revised Penal Code, Grave Misconduct, Grave Abuse of Authority, Conduct Unbecoming of a Police Officer, ug Conduct Prejudicial to the Best Interest of Service.
Sumala sa kampo sa mga nagreklamo, direkta matud pa nga nalambigit ang mga respondent sa operasyon nga miresulta sa pagkamatay sa mga personahe ni Floresta ug nakalapas sa tawhanong katungod ug existing nga balaod.
Sa pagkakaron, ginasusi na sa Ombudsman Mindanao ang reklamo aron masuta kung adunay igong basehan alang sa pagsaka og pormal nga kaso batok sa mga opisyal ug miyembro sa kapulisan nga nalambigit.
